Paglilibot sa mga sulok

Minabuti kong bisitahin ang bahay na ito upang personal na maranasan ang angking kababalaghan nito. Animo'y nasa pelikula kami dahil mararamdaman talaga ang kababalaghan sa hitsura pa lang ng bahay. Luma na ito at punung-punong mga rebultong leon, dahil Leo ang zodiac sign ng karamihan sa miyembro ng pamilyang Tuazon. Punung-puno ito ng mga bagay na antigo. Yari sa kahoy ang mga pintuan at talaga namang pansin ang luma ngunit simpleng istilong ginamit sa pagdidisenyo nito. Pagpasok sa loob, agad na mapapansin ang makulimlim na sala nito na siyang lalong magpapatindig ng iyong balahibo. Bitbitin mo pa ang mga kwentong kababalaghang paulit-ulit na nilalahad sa iyo. Kasama si Fazon, inakyat namin ang hagdanan patungo sa tore. Bawat hakbang, maririnig mo ang kalumaan ng kahoy at makikita naman sa dulo ang tuktok ng kabahayan ang pinagtagpi-tagping yero na nagmumukhang kabaong. Ito marahil ang dahilang kung bakit nagkaroon ng mga usap-usapang mayroong kabaong sa ibabaw ng tore.